फागुन–१३, खोटाङमा हुन गईरहेको “प्रथम राष्ट्रिय बाँस सम्मेलन–२०८१”का लागि बिभिन्न स्थानबाट बिज्ञ तथा सहभागीहरु कार्यक्रम स्थल दिक्तेलबजार पुग्न थालेका छन् । यही फागुन–१५ अर्थात बिहिबारदेखि सुरु हुने सम्मेलनका लागि काठमाण्डौं लगायतका बिभिन्न जिल्लाका टोलीहरु धमाधम दिक्तेलबजार उत्रन थालेका हुन् ।
दिक्तेल रुपाकोट मझुवागढी नगरपालिकाको मुख्य आयोजना तथा बन अनुसन्धान तथा प्रशिक्षण केन्द्र बबरमहल काठमाण्डौं, पर्यटन–बन तथा वातावरण मन्त्रालय कोशी प्रदेश र ग्रीन बेम्बो क्रियसन ललितपुरको आयोजनामा सम्मेलन हुन लागेको हो । नगरपालिकाले मंगलबार पत्रकार सम्मेलनको आयोजना गरी बाँस सम्मेलनको बारेमा जानकारी दिएको छ । पत्रकार सम्मेलनमार्फत बाँस सम्मेलनको सम्पुर्ण तयारी पुरा हुँदै गर्दा पाहुनाहरु पनि दिक्तेलबजार उत्रन थालेको जनाईएको हो ।
“जहाँ बाँस त्याहाँ जीवन, जहाँ जीवन त्यहाँ बाँस” भन्ने नारासहित तीन दिनसम्म जारी रहने ऐतिहासिक बाँस सम्मेलनको उद्घाटन संघीय बन वातावरण मन्त्री ऐनबहादुर शाही ठकुरीले गर्ने कार्यक्रम रहेको छ । यतिखेर जिल्ला बाँस सम्मेलनमय बनेको छ । सम्मेलनमा संघीय मन्त्रीहरु, सातै प्रदेशका मन्त्रीहरु, सांसदहरु, गभर्नर डाक्टर महाप्रसाद अधिकारी, बिभिन्न बिश्वबिद्यालयका प्राध्यापक डाक्टरहरु, बन मन्त्रालयका बिशिष्ट कर्मचारीहरु लगायतको बिशिेष उपस्थिती रहने आयोजकले जनाएको छ । यस्तै, राष्ट्रिय तथा अन्र्तराष्ट्रिय गैर सरकारी संघसंस्थाका प्रमुख वा प्रतिनिधिहरु, बाँस ब्यवसायी लगायत ब्यक्तित्वहरुको उपस्थिती रहने मेयर तीर्थराज भट्टराईले बताउनुभएको छ । कतिपय बिशिष्ट ब्यक्ति तथा सञ्चारकर्मीहरु मंगलबार बेलुकी नै जिल्लामा प्रबेश गरिसकेको जानकारी आईरहेको मेयर भट्टराईको भनाई छ ।
स्थानीय स्तरमा उपलब्ध बाँसको बहुआयामिक महत्व तथा उपयोगिता दर्शाउने लगायतका उदेश्य राखी आयोजना गरिएको राष्ट्रिय बाँस सम्मेलनमा आमन्त्रित तथा सहभागी बिशिष्ट पाहुनाहरुलाई आवासको ब्यवस्था गरिसकिएको छ । पाहुनाहरुको लागि होटल ब्यवसायी संघ खोटाङसँगको समन्वयमा आवासको प्रबन्ध मिलाइएको छ । जिल्लाबाहिरबाट बिज्ञहरुसहित करिब साढे तीन सयको हाराहारीमा सहभागी हुने नगरपालिकाले जनाएको छ । सम्मेलनमा जिल्ला बिहिरबाट २८ र जिल्लभित्रबाट ५२ बढी स्टल राखिने टुंगो लागेको छ ।
बाँसको संरक्षण, ब्यवस्थापन, दीगो उपयोग र उद्यमशीलता, प्रकृतिको संरक्षण, स्थानीय रोजगारी तथा राष्ट्रिय अर्थतन्त्रमा बृद्दि गरी समृद्द स्थानीय तह, प्रदेश र राष्ट्र बनाउने सम्मेलनको मुख्य ध्यये रहेको छ । तीन दिने सम्मेलन अवधीमा बाँसजन्य सामाग्रीहरुको प्रदर्शनी तथा बिक्रि बितरणका साथै बिज्ञहरुबाट बिभिन्न कार्यपत्रहरु प्रस्तुत लगायतका कार्यक्रमहरुको तय गरिएको छ । सम्मेलनमा बाँससँग सम्बन्धित ४४ जना बिशिष्ट ब्यक्तिबाट २३ वटा कार्यपत्र प्रस्तुत हुने कार्यक्रम तय भएको छ ।
सम्मेलनले तीन दिने सम्मेलनको मात्र अर्थ नराखी बाँससम्बन्धी राष्ट्रकै नीति निर्माण गर्ने सम्मेलनको बिशिष्ट अर्थ राख्ने नगरप्रमुख भट्टराईको भनाई छ । सम्मेलनबाट दिक्तेल घोषणापत्र सार्बजानिक गर्ने र सो घोषणापत्रकै आधारमा नेपालभर लागु हुने बाँस सम्बन्धी नीति तय हुने नगरप्रमुखले सुनाउनुभयो ।
सम्मेलनको क्रममा यलम्बर बाजा, बाँसुरी, बिनायो लगायत बाँसजन्य बाजाहरु बजाउने कार्यक्रम राखिएको छ । बाँसको महत्व र उपयोगिता दर्शाउन तथा प्रबद्र्दन गर्न लिङ्गे पिङ खेल्ने, बाँसमाथि चढेर भाले झिक्ने प्रतियोगिता लगायत बिभिन्न कार्यक्रमको आयोजना गरिएको नगरपालिकाले जनाएको छ ।
करिब ४७ लाख रुपैंयाँ बराबरको खर्च हुने अनुमान गरिएको बाँस सम्मेलनका लागि नगरपालिकाको तर्फबाट पाँच लाख रुपैंयाँ मात्र बजेट बिनियोजन गरिएको छ । अन्य खर्चका लागि वाँस सम्बन्धी काम गर्ने निकायहरु, बिभिन्न मन्त्रालय, संघसंस्था लगायतबाट नगरपालिकाको खातामा आर्थिक सहयोग जुटेको उल्लेख छ । अनुमानित खर्चमा थप हुन सक्ने आँकलन नगरपालिकाको रहेको छ । जिल्ला बाहिरबाट तीन सयदेखि साढे तीन सय जनासम्मले सम्मेलनमा सहभागी बन्ने जानकारी गराईरहेको बताईएको छ ।।